وزیراعظم محمد شہباز شریف ورلڈ اکنامک فورم کے 56ویں سالانہ اجلاس میں شرکت کے لیے سوئٹزرلینڈ پہنچ گئے ہیں۔اجلاس کے دوران وزیراعظم شہباز شریف کی امریکی صدر ڈونلڈ ٹرمپ سمیت مختلف عالمی رہنماؤں سے ملاقاتیں متوقع ہیں۔
وزیراعظم آفس کے میڈیا ونگ کی جانب سے جاری بیان کے مطابق، زیورخ کے بین الاقوامی ہوائی اڈے پر پاکستان کے مستقل نمائندے محمد بلال، سوئٹزرلینڈ میں پاکستانی سفیر مرغوب سلیم اور پاکستانی سفارتی عملے نے وزیراعظم کا پرتپاک استقبال کیا۔
ورلڈ اکنامک فورم کے اجلاس میں شرکت کے لیے نائب وزیر اعظم و وزیر خارجہ سینیٹر محمد اسحاق ڈار، وفاقی وزیر برائے اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر اطلاعات و نشریات عطاء اللہ تارڑ اور وزیراعظم کے معاون خصوصی طارق فاطمی بھی ان کے ہمراہ ہیں۔ وزیراعظم اجلاس کے مختلف سیشنز میں حصہ لیں گے۔
صدر ٹرمپ نے غزہ بورڈ آف پیس میں وزیراعظم شہباز شریف کو شمولیت کی دعوت دیدی
وہ ورلڈ اکنامک فورم کی میزبانی اور شراکت داری میں منعقدہ بزنس راؤنڈ ٹیبل میں بھی شرکت کریں گے۔
وزیراعظم پاکستان کی معاشی استحکام کے لیے کی جانے والی اصلاحات اور بہتر ہوتے معاشی اشاریوں پر روشنی ڈالیں گے اور ٹرپل او پروگرام (آرڈر، آپرچونیٹی، آپٹیمائزیشن) کے حوالے سے بھی اپنے خیالات کا اظہار کریں گے۔
