قدرت نے انجیر کو بے پناہ غذائی اجزاء سے بھرپور پھل بنایا ہے، لیکن اسے رات بھر پانی میں بھگوئے ہوئے انجیر صبح نہار منہ کھایا جائے تو اس کے اثرات دگنے ہو جاتے ہیں۔
ماہرینِ غذائیت کے مطابق بھگوئے ہوئے انجیر جسم میں توانائی بحال کرنے، نظامِ ہاضمہ کو بہتر بنانے اور کئی بیماریوں سے بچاؤ میں مدد دیتے ہیں۔
نظامِ ہاضمہ کے لیے مفید:
انجیر میں فائبر کی وافر مقدار پائی جاتی ہے جو قبض کے مسئلے کو ختم کرتی ہے اور آنتوں کی صفائی میں مدد دیتی ہے، رات بھر بھگوئے جانے سے انجیر نرم ہو جاتا ہے، جس سے اس کے غذائی اجزاء جسم میں زیادہ آسانی سے جذب ہوتے ہیں۔
مونگ پھلی جگر کے لیے نقصان دہ؟ خطرات اور بچاؤ کے طریقے
دل کی صحت کے لیے بہترین:
ماہرین کے مطابق بھگوئے ہوئے انجیر میں موجود اینٹی آکسیڈنٹس خون میں کولیسٹرول کی سطح کو متوازن رکھتے ہیں، جس سے دل کی شریانیں صاف رہتی ہیں اور دل کے امراض کا خطرہ کم ہوتا ہے۔
ہڈیوں اور دانتوں کے لیے طاقتور:
انجیر میں کیلشیم، میگنیشیم اور فاسفورس کی بھرپور مقدار پائی جاتی ہے جو ہڈیوں اور دانتوں کو مضبوط بناتی ہے، روزانہ دو سے تین بھگوئے ہوئے انجیر کھانا جسم میں کیلشیم کی کمی کو پورا کرتا ہے۔
جلد اور بالوں کے لیے فائدہ مند:
بھگوئے ہوئے انجیر میں موجود وٹامن اے، سی اور ای جلد کو تروتازہ رکھنے اور جھریوں سے بچانے میں مدد دیتے ہیں، یہ خون کی روانی کو بہتر بنا کر بالوں کی جڑوں کو بھی مضبوط کرتے ہیں۔
کولیسٹرول کیسے کنٹرول کریں؟ ماہرین کا آسان نسخہ سامنے آگیا
وزن کم کرنے میں معاون:
انجیر میں قدرتی شکر موجود ہونے کے باوجود اس میں چکنائی نہ ہونے کے برابر ہوتی ہے۔ بھگوئے ہوئے انجیر بھوک پر قابو رکھتے ہیں، جس سے وزن گھٹانے میں مدد ملتی ہے۔
کھانے کا طریقہ
ماہرین تجویز کرتے ہیں کہ رات کو دو سے تین خشک انجیر پانی میں بھگو کر رکھیں، اور صبح نہار منہ وہ انجیر کھا لیں، ساتھ ہی وہ پانی پینا بھی مفید ہے جس میں انجیر بھگوئے گئے ہوں۔
واضح رہے کہ ذیابطیس کے مریضوں یا وہ افراد جنہیں بلڈ شوگر کے مسائل ہیں، انہیں انجیر کھانے سے قبل اپنے معالج سے مشورہ کرنا چاہیے۔
