بھارت کی وزارتِ دفاع نے چیف آف ڈیفنس اسٹاف (سی ڈی ایس ) جنرل انیل چوہان کی مدتِ ملازمت میں مئی 2026 تک توسیع کا اعلان کر دیا ہے۔
جنرل چوہان 30 ستمبر 2022 سے بھارت کے سی ڈی ایس اور محکمہ عسکری امور کے سیکریٹری کے طور پر فرائض انجام دے رہے ہیں۔
بھارتی میڈیا کے مطابق ملکی کابینہ کی تقرری کمیٹی (اے سی سی) نے ان کی مدت ملازمت میں اضافے کی منظوری دی ہے جس کے بعد ان کی سروس کا نیا دورانیہ 30 مئی 2026 یا اگلے احکامات تک ہوگا۔
64 سالہ جنرل چوہان کا فوجی کیریئر 40 سال پر محیط ہے، جس میں وہ کشمیر اور شمال مشرقی بھارت میں انسداد دہشت گردی آپریشنز کی قیادت کر چکے ہیں۔
ایئر چیف کی مدت ملازمت پوری ہونے پر انکی خدمات جاری رکھنے کا بھی متفقہ فیصلہ
وہ 1981 میں 11 گورکھا رائفلز میں شامل ہوئے اور اقوام متحدہ کے امن مشن میں بھی خدمات انجام دے چکے ہیں۔
انہیں ستمبر 2022 میں بھارت کے پہلے سی ڈی ایس جنرل بپن راوت کی حادثاتی موت کے بعد اس عہدے پر مقرر کیا گیا تھا۔
سی ڈی ایس کا عہدہ بھارت کی تینوں افواج یعنی بری فوج، بحریہ اور فضائیہ کے درمیان رابطہ بہتر بنانے، دفاعی حکمت عملی کو یکجا کرنے اور وزیر دفاع کے اعلیٰ مشیر کے طور پر خدمات انجام دینے کے لیے قائم کیا گیا تھا۔
