راولپنڈی: بلوچستان کے ضلع کچھی کے علاقے کولپور میں سیکیورٹی فورسز کے آپریشن کے دوران دو دہشتگرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع کچھی کے علاقے کولپور میں سیکیورٹی فورسز نے آپریشن کیا۔ بھارتی پراکسی فتنہ الہندوستان کے دہشتگردوں کی موجودگی کی اطلاع پر کارروائی کی گئی۔
آپریشن کے دوران فائرنگ کے تبادلے میں فتنہ الہندوستان کے 2 دہشتگرد ہلاک ہوئے۔ ہلاک فتنہ الہندوستان کے دہشتگردوں کے قبضے سے اسلحہ اور گولہ بارود برآمد ہوا۔
یہ بھی پڑھیں: ساہیوال میں بدنام زمانہ ڈاکو پولیس مقابلے میں ہلاک
آئی ایس پی آر کے مطابق ہلاک دہشتگرد بھارتی سرپرستی میں متعدد دہشتگرد کارروائیوں میں ملوث تھے۔ علاقے میں ممکنہ دہشتگردوں کے خاتمے کے لیے کلیئرنس آپریشن جاری ہے۔
انہوں نے کہا کہ بھارتی سرپرستی میں ہونے والی دہشتگردی کا مکمل خاتمہ کیا جائے گا۔ دہشت گردوں کو کیفر کردار تک پہنچانے کے قومی عزم کا اعادہ کیا ہے۔
