انگلینڈ کے ٹیسٹ کپتان بین اسٹوکس گیند لگنے سے چہرے پر زخمی ہو گئے ہیں، جس کے باعث ان کی آنکھ کے گرد سوجن اور واضح نیل پڑ گیا ہے۔
اسٹوکس نے انسٹاگرام اسٹوری کے ذریعے اپنی چوٹ کی تصدیق کرتے ہوئے مزاحاً لکھا کہ “آپ کو گیند کی حالت دیکھنی چاہیے۔”
ذرائع کے مطابق اسٹوکس اس وقت نہ تو بیٹنگ کر رہے تھے اور نہ ہی بولنگ، بلکہ نیٹس سیشن کے دوران سائیڈ پر کھڑے تھے جب گیند ان کے گال پر لگی۔
بین اسٹوکس گزشتہ ماہ سڈنی میں ایشز کے پانچویں ٹیسٹ کے دوران ایڈکٹر انجری کے باعث میدان چھوڑنے کے بعد سے بحالی کے عمل میں ہیں۔ وہ اسی مہینے کے آخر میں اپنی ریکوری جاری رکھنے کے لیے ابو ظبی جائیں گے اور اینڈریو فلنٹوف کی قیادت میں انگلینڈ لائنز اسکواڈ کے ساتھ غیر رسمی کوچنگ کردار میں بھی شامل ہوں گے۔
اسٹوکس نے 2023 کے ون ڈے ورلڈ کپ کے بعد انگلینڈ کے لیے وائٹ بال کرکٹ نہیں کھیلی اور وہ اس ہفتے شروع ہونے والے ٹی ٹوئنٹی ورلڈ کپ کے اسکواڈ کا حصہ بھی نہیں ہیں۔
ان کی اگلی بین الاقوامی شرکت ممکنہ طور پر جون میں نیوزی لینڈ کے خلاف ہوم سیریز کے پہلے ٹیسٹ میں ہو سکتی ہے، تاہم اس سے قبل وہ کاؤنٹی چیمپئن شپ میں ڈرہم کی نمائندگی بھی کر سکتے ہیں۔
آسٹریلیا کے خلاف 4-1 کی شکست کے بعد اسٹوکس نے کہا تھا کہ وہ ٹیسٹ کپتان کے طور پر اپنا کردار جاری رکھنے کے لیے پوری طرح پرعزم ہیں اور ہیڈ کوچ برینڈن مک کولم کی مکمل حمایت کرتے ہیں۔
