بھارتی ٹی ٹوئنٹی کرکٹ ٹیم کے کپتان سوریا کمار یادیو(surya kumar yadav) نے تصدیق کی ہے کہ ٹی ٹوئنٹی ورلڈکپ میں پاکستان کے بائیکاٹ کے اعلان کے باوجود بھارتی ٹیم روایتی حریف کے خلاف شیڈول میچ کے لیے سری لنکا جائیگی۔
آئی سی سی ٹی ٹوئنٹی ورلڈکپ کے گروپ مرحلے میں پاکستان اور بھارت کا ہائی وولٹیج مقابلہ 15 فروری کو سری لنکا کے شہر کولمبو میں شیڈول ہے، تاہم حکومتِ پاکستان کی جانب سے اعلان کیا گیا ہے کہ قومی ٹیم بھارت کے خلاف یہ میچ نہیں کھیلے گی، جس کے بعد ٹورنامنٹ کی صورتحال پیچیدہ ہوگئی ہے اور آئی سی سی بھی اس معاملے پر تشویش میں مبتلا بتائی جا رہی ہے۔
کیا ورلڈ کپ کے اگلے مراحل میں بھی پاکستان بھارت کیخلاف میچ کا بائیکاٹ کریگا؟
جمعرات کو ممبئی میں کپتانوں کی پری ٹورنامنٹ پریس کانفرنس سے خطاب کرتے ہوئے سوریا کمار یادیو نے واضح کیا کہ بھارتی ٹیم اپنی تیاریوں اور شیڈول میں کوئی تبدیلی نہیں کرے گی۔ انہوں نے کہا کہ ٹیم کی سوچ بالکل واضح ہے اور وہ طے شدہ منصوبے کے مطابق کولمبو کا سفر کرے گی۔
بھارتی کپتان کا کہنا تھا کہ ہماری فلائٹ بک ہو چکی ہے اور ہم شیڈول کے مطابق سری لنکا جائیں گے۔ انہوں نے اس بات پر زور دیا کہ ٹیم ٹورنامنٹ کے تمام ضابطوں اور آئی سی سی پروٹوکول پر مکمل عمل کرے گی۔
رپورٹس کے مطابق پاکستان کی جانب سے میچ نہ کھیلنے کی صورت میں بھارت کو اس مقابلے کے دو پوائنٹس مل سکتے ہیں، تاہم اس کے لیے بھارتی ٹیم کو آئی سی سی کے قواعد کے مطابق مقررہ مقام پر وقت پر پہنچنا ہوگا۔ ذرائع کا کہنا ہے کہ اگر بھارت کو بائیکاٹ کی صورت میں پوائنٹس حاصل کرنے ہیں تو ٹیم کو میچ کے دن اسٹیڈیم میں موجود رہ کر تمام رسمی کارروائیاں مکمل کرنا ہوں گی۔
پاکستان ٹی20ورلڈکپ میں بھارت کے ساتھ کوئی میچ نہیں کھیلےگا،وزیراعظم
بھارتی کرکٹ بورڈ کے ذرائع کے مطابق ٹیم 15 فروری کو کولمبو پہنچ کر شیڈول کے مطابق پریکٹس سیشن کرے گی، پریس کانفرنس میں شرکت کرے گی اور مقررہ وقت پر اسٹیڈیم بھی جائے گی۔ میچ کے آغاز کے وقت بھارتی ٹیم میدان میں موجود ہو کر پاکستان ٹیم کا انتظار کرے گی۔
بھارتی میڈیا رپورٹس میں کہا گیا ہے کہ آئی سی سی قوانین کے تحت اگر پاکستان کی ٹیم مقررہ وقت پر میدان میں موجود نہ ہوئی تو میچ ریفری آفیشلی مقابلہ منسوخ کرنے کا اعلان کرے گا، جس کے بعد ہی بھارت کو اس میچ کے دو پوائنٹس دیے جا سکیں گے۔
واضح رہے کہ آئی سی سی ٹی ٹوئنٹی ورلڈکپ 7 فروری سے شروع ہو رہا ہے۔ پاکستان کے گروپ میں بھارت کے علاوہ نمیبیا، نیدرلینڈز اور امریکا کی ٹیمیں بھی شامل ہیں، جبکہ پاک بھارت مقابلے کو ٹورنامنٹ کا سب سے بڑا اور اہم میچ تصور کیا جا رہا تھا۔
